ប្រវត្តិរបស់យើង
អង្គការតំណក់ទឹក បានកើតចេញពីកិច្ចខិតខំប្រឹងប្រែងរបស់បណ្តាញគាំទ្រកុមារ Goutte d’eau។ មូលនិធិស្វីសមួយនេះ បានចាប់ផ្តើមប្រតិបត្តិការរបស់ខ្លួននៅក្នុងប្រទេសកម្ពុជា នាខែមករា ឆ្នាំ១៩៩៧។ គោលបំណងរបស់ពួកគេ គឺដើម្បីឆ្លើយតបទៅនឹងតម្រូវការបន្ទាន់ក្នុងការជួយសង្គ្រោះកុមាររស់នៅតាមដងផ្លូវ នៅក្នុងសហគមន៍អ្នកលឿង។ មូលនិធិ Goutte d’eau ត្រូវបានបង្កើតឡើងដោយក្រុមមិត្តភក្តិមួយក្រុម ដែលបានធ្វើដំណើរជុំវិញពិភពលោក ក្នុងអំឡុងពេលនៃការសិក្សារបស់ពួកគេ។ ពួកគាត់មានបំណងចង់ធ្វើសកម្មភាពអ្វីមួយ ដើម្បីដោះស្រាយបញ្ហាអយុត្តិធម៌ដែលមិនអាចសង្កេតមើលរំលងបាន ដែលពួកគាត់បានជួបប្រទះនៅក្នុងបណ្តាប្រទេសកំពុងអភិវឌ្ឍន៍។
ការងាររបស់អង្គការ Goutte d’eau នៅអ្នកលឿង ទទួលបានការចាប់អារម្មណ៍យ៉ាងខ្លាំង។ មិនយូរប៉ុន្មាន រាជរដ្ឋាភិបាលកម្ពុជាបានទាក់ទងមកពួកគាត់ ដើម្បីបង្កើតគម្រោងដូចគ្នានេះដែរនៅក្រុងប៉ោយប៉ែត។ ដោយដឹងថា អាជ្ញាធរថៃបានបណ្ដេញកុមារកម្ពុជាដែលរងគ្រោះដោយការជួញដូររាប់រយនាក់ត្រឡប់មកក្រុងប៉ោយប៉ែតវិញរាល់ខែ អង្គការ Goutte d’eau ក៏បានចាប់ផ្ដើមកិច្ចសហប្រតិបត្តិការជាមួយអង្គការ IOM (អង្គការអន្តរជាតិទេសន្តរប្រវេសន៍) អង្គការ UNICEF ក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងភ្នាក់ងារផ្សេងទៀត ដើម្បីរៀបចំរចនាសម្ព័ន្ធផ្តល់ការគាំទ្រ ការអប់រំ និងការការពារកុមារដល់កុមារទាំងនេះ ក្នុងគោលបំណងទប់ស្កាត់ និងផ្តាច់វដ្តនៃការផ្លាស់ប្តូរទីលំនៅគ្មានសុវត្ថិភាព និងការជួញដូរ។
២៤ ឆ្នាំក្រោយមក វិសាលភាពនៃប្រតិបត្តិការរបស់អង្គការ តំណក់ទឹកបានពង្រីកខ្លួនរហូតដល់ ៤ខេត្តក្នុងប្រទេសកម្ពុជា។ គម្រោងផ្សេងៗត្រូវបានបន្ថែម និងកែសម្រួលទៅតាមតម្រូវការជាក់ស្តែង ដើម្បីឆ្លើយតបទៅនឹងគម្លាតនៃការងារការពារកុមារនាពេលបច្ចុប្បន្ន។ ឧទាហរណ៍៖ អង្គការតំណក់ទឹក បានសង្កេតឃើញថាមនុស្សភាគច្រើនដែលជាកុមារមានពិការភាព ត្រូវបានគេបញ្ជូនត្រឡប់មកប្រទេសកម្ពុជាវិញ បន្ទាប់ពីពួកគេត្រូវគេជួញដូរទៅប្រទេសថៃដើម្បីសុំទាន ឬកេងប្រវ័ញ្ចផ្លូវភេទ។ យើងបានកំណត់យកបញ្ហានេះជាអាទិភាព ហើយដោយមានការគាំទ្រផ្នែកហិរញ្ញវត្ថុ និងបច្ចេកទេសពីអង្គការ Goutte d’eau យើងអាចបង្កើតកម្មវិធីផ្សេងៗឡើង សម្រាប់ជួយដល់កុមារដែលមានពិការភាពដោយឡែកតែម្តង។
អង្គការតំណក់ទឹក បន្តតាមដានមើលនិន្នាការ និងស្ថានភាពនៅទូទាំងប្រទេស ដើម្បីផ្តល់នូវកម្មវិធីសកម្មភាពប្រកបដោយភាពរស់រវើក និងឆ្លើយតបបានទាន់ពេលវេលាផ្អែកលើគោលការណ៍គ្រឹះរបស់អង្គការ គឺ៖ ការទប់ស្កាត់ ការការពារ ការកសាងជីវិតឡើងវិញ និងការធ្វើសមាហរណកម្ម។